Luke 1

1Godta dia꞉ dulu dla oko hamhaluwaye opa opitapo kotiyamale tle koko e tlapame yia꞉ ma God oko hamama opa dulu dla koko eye atlamsiyamuwapo. Yia꞉ta atlamsiyama koko eye di ma me-daluwa. Epalati ma opa opitapo ikadepe yo dlalle so mate epo koko e tlamale so mateta atlamala dalepame yia꞉ koko eye buka dla ilalimuwapo. 3Epedeme na꞉ ma koko hapuloma eye na꞉ta woloma kotiyamale tle malastademe na꞉ mape yu iye woloma ilima. Epapedeme Tiyopoles namkale, wa꞉ta daluwa koko eye wa꞉ta woloma ikadepe koko dlepo depame na꞉ta wa꞉ watle yu ilimale iye hamima.

Yon opa yú dla ka꞉ka꞉timalalo hamolowe kokoye botomastale

5Helodta Yudiya mo dla dokopala oplami halale oloma edla God ka꞉ epo opa ka꞉ duka dla hallalo oplami hale halaiyo, ya꞉ hiye Sekalaya. Ya꞉ God ka꞉ epo opa ka꞉ duka dla ha꞉ha꞉lalo so alumale hale Abiya alumale dulu dla halaiyo. Epo ya꞉llu hiye Elisabet, ya꞉ ma A꞉lon ya꞉ asiyapo. 6Epapeleye Sekalaya mate Elisabet mate God mila꞉pi tle woloma ka꞉ka꞉depo ha꞉ha꞉mama Godta molo atlale yu woloma dolumha꞉ha꞉iyo. 7Amasiyama yia꞉ yimlala hawa ha꞉ha꞉iyo. Adipalati, Elisabet ya꞉ye hamkapi a꞉ya polomama ma-alluyemala halaiyo. Epalati Sekalaya mape mo-totoyemala halaiyo.

8Alila haleta Sekalaya ya꞉ alumale sota oko halowe alilata pulati Sekalayata Yu so aiyalma aya dla hetame God mila꞉pi tle halemama oko hamhalaiyo. 9Epalati God ka꞉ epo opa ka꞉ duka dla ha꞉ha꞉lalo sota yia꞉ dulu dla oplami hale hulumolowedeme ewala mate tatipiyele hale tatipiyemdiyo. Epapedeme yia꞉ta yia꞉ dulu dla epo ewala mate tatipiyemama Sekalayata tla꞉mtaiyo. Epalati yia꞉ta Sekalayaye Lod ya꞉ aiyalma aya dulu dla ullu ka꞉dle seyamale ha꞉lepo depame hulumaiyo. Epedeme Sekalayata Yu so aiyalma aya dla hetame ullu ka꞉dle seyamale ha꞉mhalaiyo. 10Epame ya꞉tapo ullu ka꞉dle seyamale ha꞉mhallati opa hapulomata aiyalma aya alikili tle ha꞉ha꞉mama inoma sumha꞉ha꞉iyo.

11Sekalayaye aiyalma aya dulu dla me-hallati God ya꞉ banakaka oplamita ullu ka꞉dle seyamale ha꞉lalo tile dowala tiyama dla woyame halaiyo. 12Epalati Sekalayata banakaka oplami natipame sikemte yelepame wota꞉iyo. 13Amasiyama God ya꞉ banakakata ya꞉ watle epo atlaiyo, “Sekalaya, wa꞉ ase sikemte wota꞉miya. Godta wa꞉ta inoma sumhaluwaye ma-daluwapo. Wa꞉ allu Elisabetta mopapo polopame maseyemala hamelepe. Epalati wa꞉tapo maseyemala ya꞉ hiye Yon dlepe. 14Ya꞉tapo wa꞉ dla siyele hampulupe, epame opa hapulomata ya꞉ hamalati sisiyelepe. 15Adipalati, ya꞉tapo Lod mila꞉pi tle pato oplami hallepe. Epedeme ya꞉tapo kawata yú podlowa. Amasiyama ya꞉ye ya꞉ waita ya꞉ hamale tle kotiyapo Hela꞉dle Sokota pasatepo hallepe. 16Ya꞉tapo Isalael soye mamisika꞉ Lod yia꞉ God hala dla elempulupe. 17Ya꞉ Ilayata itiyamale mate haluwa epapele some halemama Lodta puluwedeme hallati ya꞉ tatle olomasepele pulupe. Epame ya꞉tapo opaye Lodta pua koko dla dinapomama adulo mate yia꞉ yimlala mateye sadle koko dla elempulupe. Epame ya꞉tapo God yu dla posalladepo siyamalalo sota malamaleye ma ka꞉dle koko halowe malamale dla elempulupe.”

18Amasiyama Sekalayata God ya꞉ banakaka oplami watle epo atlaiyo, “Na꞉ apa koko natipame wa꞉ta atla kokoye ikadepe depa꞉? Adipalati, na꞉ye mo-totoyemala halapo, epame na꞉ a꞉ya ma ma-alluyemala polapo,” diyo.

19God ya꞉ banakaka oplamita asiyama ya꞉ watle epo atlaiyo, “Na꞉ hiye Ga꞉ibiliyelpo. Na꞉ye God mila꞉pi tle halemdepo. Godtapo na꞉ye tulune de, na꞉tapo wa꞉ watle ka꞉dle yu iye atlepo depame. 20Amasiyama wa꞉ dalene, wa꞉ yu pa꞉le oplami depo hallepe. Adipalati, wa꞉ na꞉ yu dla pomikadepedesema. Epedeme wa꞉ yu pa꞉po hallati na꞉ta wa꞉ watle atlamale koko ita wowoyamolowe alilata umulati edla natipame matle yukamelepe,” diyo.

21Sekalayata aiyalma aya dulu dla halemama kokó dlati opa hapulomata alikili dla omha꞉ha꞉mama epo atlamyaiyo, “Ya꞉ apa koko hamhalemama amma꞉?” demyaiyo. 22Epalati Sekalayata aiyalma aya tle matime poyukamalalo halemama isikimi do yu mate atlamaiyo. Epalati opata koko e natipame momalamaiyo, “Ya꞉ye aiyalma aya dulu dla halemama inomata meyelope dlati ulugiyemale koko tlamayo,” diyo.

23Sekalayata aiyalma aya dulu dla oko hamhalale alilata mo-puame gudlati ya꞉ ma ilame ya꞉ mo dla taiyo. 24Alotle Sekalaya ya꞉llu Elisabetta mopapo pollati mama 5 dulu dla ya꞉ta hatlo ya꞉ aya dulu dla halaiyo. 25Epame Elisabetta ya꞉skamu epo malamdiyo, “Lodta na꞉ gaduwapo, epame ya꞉tapo na꞉ta opa mila꞉pi dla hamkapi polomama wota꞉mduwaye ma-hamastauwapo,” demdiyo.

Yesu hamolowe kokoye botomastale

26Elisabetta mopapo polaleye mama 6 mo-pololepo hallati Godta ma ya꞉ banakaka oplami Ga꞉ibiliyelye tulune diyo, homta pollalo ipilalo Meli watle. Meliye Ga꞉lili mo pato dulu dla Nasalet mo dla hallalo a꞉yayo. Epapeleye Deibidi mate asiya hatlope oplami haleta Meli halowedeme halaiyo, ya꞉ hiye Yosep. 28Epeleye God ya꞉ banakaka oplamita tulume Meli watle epo atlaiyo, “Namkale, Godta sale a꞉ya wa꞉po. Godta wa꞉ mate halapo,” diyo.

29Meli yu i dalepo yelepame yu i ya꞉ dulu kokoye sikemte momalamaiyo. 30Amasiyama God ya꞉ banakaka oplamita asiyama Meli watle epo atlaiyo, “Meli, wa꞉ ase sikemte wota꞉miya. Adipalati, Godta sale a꞉ya wa꞉po. 31Wa꞉tapo mopapo polopame maseyemala hamelepe. Epame wa꞉tapo ya꞉ye Yesu sepilipe. 32Ya꞉tapo pato hallepe, epame ya꞉ye di ikadepe dla hallalo God Yami dlepe. Epame Lod Godta ya꞉ mama Deibidita dokopala haluwa moye ma ya꞉ watle hamilipe. 33Epalati ya꞉tapo Yokob ya꞉ asiya dulu dla dokopala oplami hallepe. Epame ya꞉ta dokopala depo hallowe kokota sukulu pa꞉le ellepe,” diyo.

34Epalati Melita asiyama God ya꞉ banakaka watle epo atlaiyo, “Koko iye adipo na꞉ dla epo woyapa꞉? Na꞉ oplami koko yeliyena,” diyo.

35Amasiyama God ya꞉ banakaka oplamita epo atlaiyo, “Hela꞉dle Sokota wa꞉ dla tullupe, epame di ikadepe dla hallalo Godta itiyamaleta wa꞉ye bopudlepe. Epapedeme wa꞉ta hamolowe maseyemalaye aiyalmapo, epame ya꞉ye God Yami dlepe. 36Epedeme wa꞉ dalene. Wa꞉ a'ya Elisabet malamane. Ya꞉ye mo-alluyemala polomama hamkapi a꞉ya poloma duwapo. Amasiyama ya꞉ye watapo mopapo pola mama ma 6 halapo. 37Adipalati, God ya꞉ dla koko hapuloma dulu dla kokalle hawa,” diyo.

38Melita epo atlaiyo, “Na꞉ye Lod ya꞉ yu dla salladepo sela꞉lalo a꞉yapo. Epedeme wa꞉ta atlamale kokota na꞉ dla wowoyamelepe,” diyo. Epalati God ya꞉ banakaka oplamita Meli saliyome taiyo.

Melita Elisabet natila tale

39Epame oloma edla Melitapo dinapopame ma hapele Elisabet natila taiyo. Ya꞉ Yudiya tamali mo dla hetame Sekalayata hala mo yemala dla woyapame ma Sekalaya aya dla taiyo. Ya꞉ Sekalaya aya dla hetame Elisabet natipame namkale dle yu atlaiyo. 41Elisabetta Melita namkale dle yu atla dalle oloma edla owayemalatapo ya꞉ koko dulu dla humsela꞉iyo. Epame Elisabetye Hela꞉dle Sokota tulume ya꞉ dla haiyo. 42Epalati ya꞉ta yu teta꞉le mate epo atlaiyo, “Wola꞉ hapuloma dulu dla Godta wa꞉ dla siyele pato hamimama wa꞉ koko dulu dla pola maseyemala dla mape siyele hamipo. 43Na꞉ popato a꞉ya tlope, na꞉ Lod ya꞉ waita na꞉ natila pualepo. Koko edla na꞉ sikemte siyema. 44Epame wa꞉ta na꞉ watle namkale dle yu atlati owayemala na꞉ koko dulu dla polata siyemama humsela꞉. 45Wa꞉ Lodta wa꞉ dla woyamolowe koko atlati dalepame yu edla mikadepe duwa koko tle Lodta wa꞉ dla siyele hamilipe,” diyo.

Melita God hi di dla ta꞉demama siyele hamili

46Epame Melita epo atlaiyo,

“Na꞉ dupa dulu tle Lod dla siyele yu atlama.
47Epame na꞉ sokota na꞉ God na꞉ pasakalo gadlalo dla siyema.
48Adipalati, ya꞉ta malamale pato himiwapo,
ya꞉ yu dla salladepo sela꞉lalo koko pa꞉le a꞉ya na꞉ dla.
Epedeme oloma itle tamama opa hapulomatapo na꞉ watle siyele a꞉ya dlepe.
49Adipalati, itiyamale Godtapo na꞉ dla koko patoto ma-halomuwapo.
Ya꞉ hiye aiyalmapo.
50Opa anawolotapo God wowota꞉mha꞉ha꞉ma꞉,
yia꞉ dla Godta polowamaletapo kokó ellepe.
51Ya꞉ dotapo koko patotoye ma-halomuwapo.
Epame ya꞉tapo yiskamu yia꞉ tlo ka꞉ka꞉dena depo di dla halopo hetlalo soye alikili a꞉ma posaluwapo.
52Epo ya꞉tapo dokopala depo popa꞉lalo soye ma isili dla ipila꞉pame
atali soye gagademama di dla halopo hetauwapo.
53Epame ya꞉tapo daya pa꞉talo soye ka꞉ka꞉dle alisisi mate gadepame
asiyama alisisi poposatilimale soye alisisi dimi alikili a꞉ma posaluwapo.
54Epame ya꞉tapo di mamadulo mate yu itiyapo himiwaye e dolumama
ya꞉ yu dla salladepo siyamalalo Isalael soye gaduwapo.
Epedeme ya꞉ta polowamale kokotapo A꞉iblaham mate ya꞉ mamadulo mate dla kokó ellepe.”
56Meliye Elisabet mate halemama mama dapahatlope pololepo gudepame ma ilame ya꞉ mo dla taiyo.

Yon opa yú dla ka꞉ka꞉timalalo hamale

57Elisabetta owayemala hamolowe alilata mo-pulati ya꞉ maseyemala hamaiyo. 58Godta Elisabet watle koko ka꞉dle halë edla ya꞉ asiyadulo mate epo ya꞉ mateka꞉pi dla ha꞉ha꞉lalo so mate koko i dalepo siyele yimkata Elisabet mate ta꞉diyo. 59Epame maseyemala hamale alotle alila 8 umulati yia꞉ta hapuloma maseyemala e ya꞉ kapala kestlowedeme puame alumaiyo. Epame yia꞉ solotamaiyo, maseyemala hiye ya꞉ a Sekalaya hi sepilowedeme. 60Amasiyama ya꞉ waita epo atlaiyo, “Hao, ya꞉ hiye Yon dlepe,” diyo.

61Amasiyama yia꞉ta Elisabet watle epo atlaiyo, “Yonye powa꞉ toto hi,” diyo.

62Epame yia꞉ ma maseyemala ya꞉ a watle maseyemala hi dallowedeme do yu mate atlaiyo. 63Epalati Sekalayata opa watle hotowe mate namkalapi mate daliyo, maseyemala hi himilowedeme. Epame ya꞉ta maseyemala hiye epo himiyo, “Ya꞉ hiye Yon.” Epalati opa hapulomata koko i natipo sikemte yiyelepame momalamyaiyo. 64Epame pakasiyamalalo Sekalayata poyukamalalo halaleta matle yukamolowe kotiyapame God dla siyele ta꞉demsela꞉iyo.

65Epalati mo edla ha꞉ha꞉lalo sotapo koko i natipo wowota꞉iyo. Epame Yudiya tamali mo dla ha꞉ha꞉lalo so mape koko iye dlalemtaiyo. 66Epame koko i dallalo sota momalamama epo atlamyaiyo, “Maseyemala iye adipapele oplamita halepa꞉?” demyaiyo. Adipalati, yia꞉ natiyo, Lodta itiyamaleta ya꞉ mate hallati.

Sekalayata God hi di dla ta꞉demama siyele hamili

67Yon ya꞉ a Sekalayata Hela꞉dle Sokota pasatepo halemama amile dla wowoyamolowe kokoye momolo epo atlamaiyo,

68“Isalael so yia꞉ Lod God hi di dla ta꞉diya.
Adipalati, ya꞉tapo puame asiyama mate dia꞉ye ya꞉ hala dla elempulupe.
69Epame dia꞉ dla God ya꞉ oko oplami Deibidi ya꞉ asiya dulu tle pasakalo gadlalo oplami pato di watle ma-hamipo.
70Koko iye Godta ka꞉yapa ya꞉ mila꞉pi tle aiyalma depo ha꞉ha꞉uwa molo atlamalalo so mati tle di watle ma-atlamuwapo.
71Epapedeme Godtapo dia꞉ye dia꞉ mate opahale demha꞉ha꞉ sota itiyamale tle
epo dia꞉ dla allimha꞉ha꞉ so dulu tle alikili dla eleme woyamelepe.
72Epame ya꞉tapo di mamadulo dla polowamale kokoye himhalli duwapo.
Epame ya꞉tapo A꞉iblaham mate yu itiyapo himili eye malahalli duwapo.
74Epapedeme Godtapo dia꞉ye dia꞉ mate opahale demha꞉ha꞉ so do dulu tle eleme alikili dla woyamelepe,
ditapo God ya꞉ oko hamha꞉ha꞉mama wota꞉le pa꞉po ha꞉ha꞉lepo depame.
75Adipalati, ya꞉tapo dia꞉ye ya꞉ mila꞉pi tle mo-ullu pa꞉talo so dlepe.
76Amasiyama na꞉ maseyemala, wa꞉ye opatapo di ikadepe dla hallalo God yu molo atlalo oplami dlepe.
Adipalati, wa꞉tapo Lodta puluwedeme hallati wa꞉ tatle tame ya꞉ apiye dinapelepe.
77Wa꞉tapo ya꞉ opaye pasakalo halowe kokoye imelepe,
eye Godta yia꞉ bobtalimale howahalowe kokoye apopo.
78Godtapo dia꞉ye polowamama sikemte malahalapo.
Epapedeme Pepele di tle dia꞉ dla alila amkota alallowedeme pulupe.
79Hela꞉dle itapo polowe dulu dla ha꞉ha꞉ so mate
epo amtuwale dulu dla ha꞉ha꞉ so mate dla domala pulupe.
Epame hela꞉dle itapo dia꞉ye Godta sadle dla elemtelepe.”
80Yontapo ta꞉mama Soko tle itiyamale oplami depo halaiyo. Ya꞉tapo dalupa dulu dla halepo depame ma alilata pulati Isalael so opa dla ka꞉dle yu atla puaiyo.